Zolyty to po polsku randka. Na zŏlyty karlus prosi frelka, kero fest mu sie spodobała abo swoja dziouszka abo libsta, keryj przaje. To je fest wŏżne, aby pamiyntać, iże na zolyty to niy ino na poczōntku kōnszachtu, ale durś łazić.
Kaj iść na zolyty?
Zŏlyty to niy ino kafyj, tyj abo tortensztik w restauracyji. Na zŏlyty możno iść na szpacyr abo nawet do tyjatru, jak fto mŏ w bajtliku niy ino kotlŏki. Znōm tyż takich, kerzy do szynku na biyr dziouszka biōrōm. Padajōm, iże po alkoholu to nojprościj poznać, fto jaki je. Jŏ tam wola barzij kulturalnie i na zŏlyty na ôbiŏd abo tyj łaża. Jak mōm wiyncyj czasu to padōm do mojij frele – puć pojadymy kaj w gōry abo na koło! Łōna zawdy raduje sie na takie idyje.
Pamiyntejcie, aby na zolyty niy przijść niyskoro i niy ôblyc sie jak borŏk. Wybiglowano koszula abo czysty klajd muszōm być na zicher. Nojlepij wysztiglować sie zawczasu w dōma, coby gańby na zolytach sie niy narobić.
Fto łazi na zolyty?
Dŏwno tymu to karlus zaprŏszoł i płaciōł za frelka, z kerōm poszoł na zolyty. Terŏzki czasy sōm inksze, kobiyty chcōm płacić same, a czynsto to i ône zaprŏszajōm chopōw na kafyj. Bezmała to bestusz, bo chopy terŏz sōm jak rzić w kraglu, sami sie gańbujōm i rady niy dajōm. Ja, to je richtich prŏwda. Chopski ańfach mōmy tukej i terŏz, a nasze chopy niy sōm inksze ôd polskich.
A po zolytach…
Jak na zŏlytach gryfnie sie gŏdało, to chop może dŏć dziouszce kusika, abo dzióbka jak fto woli. Niykerzi tyż sie mamlajōm, ale to słowo kere fest mje sie niy podobo. Dyć niy powiym frelce, iże rod żech je z niōm mamlać, bo w pysk dostana zarŏzki. Lepij powiym – Twoje kusiki sōm jak cześnie, słodkie i czyrwōne.
Aaaaaaa! I takie jak tyn teksty fest lubia Tuudinecie! :)
Dzienkuja fest!
A ja byłam pewna że zoloty to inaczej podryw
A jo na takie zolyty z moim chodziła do
kina i na lody…kiedy to było, ale terozki tysz czasym idymy ale na kawa abo na szpacyr
Dobrze, że durś na zolyty łazicie :)
Bardzo dobry tekst. Dziękuję Ci za niego.
Dzięki Emil, do usług :)
Tudi szykownie sam żeś to szkryfnou.Jo ze mojom frlelpm łazioł tysz na badyansztalt sie toplać
Bardzo fajny text ło zolytach.jak go czytołsz na gośno to jeszcze lepi klinguje i moj czas jak modoł dziołcha mi sie przipominoł.
Dali tak!